Raden Samba iku satriya saka
Parang Garudha. Dheweke putra narendra gung Dwarawati Prabu Sri Bathara Kresna,
kang patutan klawan garwa prameswari Dewi Jembawati. Dewi Jembawati dhewe
putrane Kapi Jembawan, sawijining brahmana kang apaes wanara saka pertapan
Banon Cinawi.
Kacarita
Raden Samba klebu satriya kang bagus rupane, branyak pasemone, lan grapyak.
Pangandikane receh nreweteh, lan nyengsemake sok sapa wae kang mirengake. Samba
uga kondhang pinter ndhagel, lan olah kridhaning beksan.
Nanging
sanadyan wis kawisudha dadi raja putra Dwarawati, lan kagadhang nggenteni
keprabone ramane, Raden Samba emane ora nduwe pethingan babagan olah
kaprajuritan. Kuciwane maneh, Samba uga ora prigel babagan tata kaprajan, sarta
kawruh kanarendran. Mung wae Samba kondhang pinter memanuhara, lan gawe welas
asihe sapa wae kang sesandhingan.
Saka
prigele anggone memanuhara, bibine yaiku Dewi Wara Sumbadra kang sewaune
gething kepati klawan panengah Pandhawa Raden Arjuna, dadi luluh lan gelem
ginarwa dene satriya saka Madukara kuwi. Samba uga nduweni dasanama, utawa
sesebutan liya kaya ta Raden Wisnubrata, ya sang Kresna Siwi.
Ing
lakon Samba Juwing, kacarita Raden Samba nemu apes. Sebab Hyang Drema kleru
manitis marang ragane. Kamangka Hyang Dremi garwane, manitis marang Dewi
Hagnyanawati kang tata lahir wis ginarwa dening Prabu Bomanarakasura, ya
kakange Samba.
Kahanan
kuwi ora wurunga marahi Samba nandang wuyung, lan nerak angger-anggering
kautaman kanthi ngrusak pager ayu. Lan pungkasane Samba nemu pralaya sebab
kapilara dening Bomanarakasura kanthi dijuwing-juwing ragane.
Wayang
Samba gagrak Surakarta dhewe bentuke satriya lanyapan utawa longokan. Netrane
njait, grana sembada, lan suwarane cemengkling. Agemane sanggul kadhal-menek,
rineka garudha mungkur, asesunting sekar kluwih. Kalung roncen, agemane
bokongan pangeranan.
Tidak ada komentar:
Posting Komentar